Laugardaginn 10. október fengum við að finna G-þyngdarkrafta þegar áhöfnin á Stefni, glænýjum björgunarbát Hjálparsveitar skáta í Kópavogi, kíkti til okkar í heimsókn. Verið var að prufusigla bátnum sem er ný og alíslensk hönnun. Þetta er fyrsti íslenski sérsmíðaði björgunarbáturinn og er hannaður og smíðaður af Rafnar í Kópavogi. Botnlag bátsins þykir byltingarkennt en hann er hannaður til að liggja ákaflega vel á öldunum.
Nokkrum félögum Björgunarfélagsins var boðið í stutta siglingu og var það mál manna að báturinn er bæði öflugur og ákaflega þýður í siglingu. Stefnir er búinn tveimur 250 hestafla utanborðsmóturum. Venjulegur ganghraði er í kringum 30-32 hnútar en hámarkshraði 42 hnútar. Siglingin frá Kópavogi tók því ekki nema um tuttugu mínútur. Eftir að hafa fengið sýningu á bátnum og prufusiglingu var haldið í höfuðstöðvar okkar þar sem áhöfn Stefnis skoðaði meðal annars bátinn sem við erum með í smíðum og höfðu menn um margt að spjalla.
Deila á Facebook